عشقت عيون بتخدعنى
=====================
فى يوم تايه عن الأيام وشارد فى زمن ضايع
قابلت اميرة الأحلام وكان فجر الهوى طالع
فى عز النور خدتنى بحور من الأشواق لأحلامه
رموشه تقول انا العصفور وغصن حياتى ايامه
سافرت بعيد على جناحه وشوفت الدنيا ضحكايه
وعشت معاه فى افراحه داريت احزانه جوايا
وفجأة لقيته بيخونى فى قلب الروح بيطعنى
بسيف مسموم وكل ما اقوم يعود من تانى يكسرنى
وكانت حلم احلامى وكنت فى دنيته لعبة
امير على عرش اوهامى وتاج الحب كان كدبة
وليه تعنل كده فيا وانا والله حبيتك
وهبتك روحى وعنيا وجوه القلب داريتك
يارتنى ما كنت شفتك ولا قربت من قلبك
ده خدنى سنين كما العاشقين وسابنى حزين على حبك
لقيت النور سراب مهجور وليل احزانى بينادى
وكان الحب طير مكسور بعيد عن عشنا الهادى
خدعتينى وخنتينى وبعتينى لأحزانى
وكان عشمى تحبينى وضى عنيكى يرعانى
لكن قلبك هجر قلبى جرحنى وباع سنين حبى
وانا اخلصت لعنيكى وفيها الغدر متخبى
وكنت اناديك تسمعنى وكنت اداريك فى احضانى
عشقت عيون بتخدعنى ومشغولة بحبيب تانى
تعالى يا طير بعيد عنه نعيش فى الحزن وحدينا
ولو نور الحياه منه هتحلى الضلمة فى عنينا
فى يوم تايه عن الأيام وشارد فى زمن ضايع
رمانى فى بحر من الأوهام وراح الفرح مش راجع
دموعى دليل على حزنى وعنها كرامتى تمنعنى
كدب قلبى صدق ظنى .. لقيته وهو ضيعنى
لقيته وهو ضيعنى
Sent from my BlackBerry® wireless handheld
Subscribe to:
Post Comments (Atom)
No comments:
Post a Comment